ਪੰਜਾਬ ਅੰਦਰ 12ਵਾਂ ਧਮਾਕਾ, ਇਸ ਵਾਰ ਪੁਲਿਸ ਮੁਲਾਜ਼ਮ ਦਾ ਘਰ ਬਣਾਇਆ ਨਿਸ਼ਾਨਾ, ਬੱਬਰ ਖਾਲਸਾ ਨੇ ਲਈ ਜ਼ਿੰਮੇਦਾਰੀ

ਇਸ ਤੋਂ ਪਹਿਲਾਂ 3 ਫ਼ਰਵਰੀ ਦੀ ਰਾਤ ਨੂੰ ਅੰਮ੍ਰਿਤਸਰ ’ਚ ਫਤਿਹਗੜ੍ਹ ਚੂੜੀਆਂ ਪੁਲਿਸ ਚੌਕੀ ਦੀ ਚਾਰਦੀਵਾਰੀ ਦੇ ਬਾਹਰ ਧਮਾਕਾ ਹੋਇਆ ਸੀ।

ਗੁਰਦਾਸਪੁਰ ਜਿਲ੍ਹੇ ਦੇ ਬਟਾਲਾ ਦੇ ਰਾਏਮਲ ਪਿੰਡ ’ਚ ਇਕ ਪੁਲਿਸ ਮੁਲਾਜ਼ਮ ਦੇ ਘਰ ਨੇੜੇ ਸੋਮਵਾਰ ਰਾਤ ਨੂੰ ਇੱਕ ਧਮਾਕਾ ਹੋਇਆ। ਇਹ ਪੰਜਾਬ ’ਚ ਪੁਲਿਸ ਚੌਕੀਆਂ ਨੂੰ ਨਿਸ਼ਾਨਾ ਬਣਾ ਕੇ ਕੀਤੇ ਜਾ ਰਹੇ ਧਮਾਕਿਆਂ ਦੀ ਲੜੀ ’ਚ 12ਵਾਂ ਧਮਾਕਾ ਹੈ ਅਤੇ ਨਵੰਬਰ 2024 ਦੇ ਅੱਧ ਤੋਂ ਬਾਅਦ ਕਿਸੇ ਪੁਲਿਸ ਮੁਲਾਜ਼ਮ ਦੇ ਘਰ ਨੂੰ ਨਿਸ਼ਾਨਾ ਬਣਾ ਕੇ ਕੀਤਾ ਗਿਆ ਪਹਿਲਾ ਧਮਾਕਾ ਹੈ। ਇਹ ਧਮਾਕਾ ਤਕਰੀਬਨ ਦੋ ਹਫ਼ਤਿਆਂ ਤੋਂ ਬਾਅਦ ਹੋਇਆ। 

ਐਸਐਸਪੀ ਨੇ ਕੀਤੀ ਪੁਸ਼ਟੀ

ਬਟਾਲਾ ਦੇ ਐੱਸ.ਐੱਸ.ਪੀ. ਸੁਹੇਲ ਕਾਸਿਮ ਮੀਰ ਨੇ ਪੁਸ਼ਟੀ ਕਰਦੇ ਹੋਏ ਕਿਹਾ ਕਿ ਰਾਏਮਲ ਪਿੰਡ ’ਚ ਰਾਤ ਕਰੀਬ 8:30 ਵਜੇ ਇਕ ਤੇਜ਼ ਆਵਾਜ਼ ਸੁਣੀ ਗਈ, ਜੋ ਘੱਟ ਤੀਬਰਤਾ ਵਾਲੇ ਬੰਬ ਕਾਰਨ ਹੋਈ ਜਾਪਦੀ ਹੈ। ਕਾਸਿਮ ਨੇ ਕਿਹਾ, ‘‘ਅਜੇ ਇਹ ਸਪੱਸ਼ਟ ਨਹੀਂ ਹੈ ਕਿ ਇਹ ਗ੍ਰੇਨੇਡ ਧਮਾਕਾ ਸੀ ਜਾਂ ਵਿਸਫੋਟਕ ਦਾ ਕੋਈ ਹੋਰ ਰੂਪ। ਅਸੀਂ ਇਸ ਗੱਲ ਦੀ ਪੁਸ਼ਟੀ ਕਰ ਰਹੇ ਹਾਂ ਕਿ ਧਮਾਕਾ ਹੋਇਆ ਹੈ। ਕਿਵੇਂ  ਹੋਇਆ ਅਤੇ ਸਹੀ ਸਥਿਤੀ ਨੂੰ ਸਮਝਣ ਲਈ ਕਾਰਨਾਂ ਦੀ ਜਾਂਚ ਕੀਤੀ ਜਾ ਰਹੀ ਹੈ।’’ ਇਹ ਵੀ ਪੁਸ਼ਟੀ ਕੀਤੀ ਗਈ ਕਿ ਧਮਾਕਾ ਇਕ  ਪੁਲਿਸ ਮੁਲਾਜ਼ਮ ਦੇ ਘਰ ਦੇ ਨੇੜੇ ਹੋਇਆ। ਪੁਲਿਸ ਨੇ ਮਾਮਲੇ ਦੀ ਜਾਂਚ ਸ਼ੁਰੂ ਕਰ ਦਿਤੀ  ਹੈ। ਫੋਰੈਂਸਿਕ ਟੀਮਾਂ ਨੂੰ ਵੀ ਮੌਕੇ ’ਤੇ  ਬੁਲਾਇਆ ਗਿਆ ਹੈ। 

ਬੱਬਰ ਖਾਲਸਾ ਨੇ ਲਈ ਜ਼ਿੰਮੇਦਾਰੀ 

ਬੱਬਰ ਖਾਲਸਾ ਇੰਟਰਨੈਸ਼ਨਲ ਦੇ ਅੱਤਵਾਦੀ ਹੈਪੀ ਪਾਸੀਆਂ ਅਤੇ ਉਸਦੇ ਸਾਥੀ ਸ਼ੇਰਾ ਮਾਨ ਨੇ ਧਮਾਕੇ ਦੀ ਜ਼ਿੰਮੇਵਾਰੀ ਲਈ ਹੈ। ਇੱਕ ਪੋਸਟ ਉਨ੍ਹਾਂ ਨੇ ਸੋਸ਼ਲ ਮੀਡੀਆ 'ਤੇ ਸਾਂਝੀ ਕੀਤੀ ਜਿਸ ਵਿੱਚ ਲਿਖਿਆ - ਮੈਂ, ਹੈਪੀ ਪਾਸੀਆਂ ਅਤੇ ਮੇਰਾ ਭਰਾ ਸ਼ੇਰਾ ਅੱਜ ਰਾਏਮਲ ਪਿੰਡ ਵਿੱਚ ਪੁਲਿਸ ਮੁਲਾਜ਼ਮ ਜਤਿੰਦਰ ਦੇ ਘਰ ਹੋਏ ਗ੍ਰਨੇਡ ਹਮਲੇ ਦੀ ਜ਼ਿੰਮੇਵਾਰੀ ਸਵੀਕਾਰ ਕਰਦੇ ਹਾਂ।  ਦੋ ਮਹੀਨੇ ਪਹਿਲਾਂ ਉਹ ਕੁਝ ਪੁਲਿਸ ਵਾਲਿਆਂ ਨਾਲ ਮੇਰੇ ਘਰ ਗਿਆ ਅਤੇ ਮੇਰੇ ਪਰਿਵਾਰ ਨਾਲ ਬਦਸਲੂਕੀ ਕੀਤੀ ਅਤੇ ਜ਼ਬਰਦਸਤੀ ਕੈਮਰਿਆਂ ਦਾ ਡੀਵੀਆਰ ਕੱਢ ਦਿੱਤਾ।  ਪਹਿਲਾਂ ਵੀ ਉਹ ਰਾਮਦਾਸ ਇਲਾਕੇ ਦੇ ਹੋਰ ਪਰਿਵਾਰਾਂ ਨੂੰ ਤੰਗ  ਕਰਦਾ ਰਿਹਾ, ਜਿਸਨੂੰ ਅਸੀਂ ਨਾ ਤਾਂ ਪਹਿਲਾਂ ਬਰਦਾਸ਼ਤ ਕੀਤਾ ਅਤੇ ਨਾ ਹੀ ਹੁਣ ਬਰਦਾਸ਼ਤ ਕਰਾਂਗੇ। ਕੋਈ ਵੀ ਪੁਲਿਸ ਅਫ਼ਸਰ ਜਿਸਨੂੰ ਇਹ ਸਭ ਕਰਨ ਦਾ ਸ਼ੌਕ ਹੈ, ਉਸਨੂੰ ਇੱਕ ਵਾਰ ਆਪਣੇ ਪਰਿਵਾਰ ਵੱਲ ਝਾਤੀ ਮਾਰਨੀ ਚਾਹੀਦੀ ਹੈ ਅਤੇ ਇਸ ਸ਼ੌਕ ਨੂੰ ਫਿਰ ਪਾਲਨਾ  ਚਾਹੀਦਾ ਹੈ।  ਸਾਡੇ ਵੱਲੋਂ, ਇੱਟ ਦਾ ਜਵਾਬ ਪੱਥਰ ਨਾਲ ਦਿੱਤਾ ਜਾਵੇਗਾ ਅਤੇ ਜਿਸ ਤਰ੍ਹਾਂ ਪੁਲਿਸ ਝੂਠੇ ਮੁਕਾਬਲਿਆਂ ਅਤੇ ਨਾਜਾਇਜ਼ ਪਰਿਵਾਰਾਂ ਨੂੰ ਤੰਗ ਕਰਨ ਤੋਂ ਨਹੀਂ ਗੁਰੇਜ਼ ਕਰ ਰਹੀ ਹੈ, ਉਸੇ ਤਰ੍ਹਾਂ ਬਹੁਤ ਜਲਦੀ ਇੱਕ ਬਹੁਤ ਵੱਡੀ ਕਾਰਵਾਈ ਕਰਕੇ ਜਵਾਬ ਦਿੱਤਾ ਜਾਵੇਗਾ।  ਜਿਸ ਵਿੱਚ ਪੁਲਿਸ ਅਧਿਕਾਰੀਆਂ ਨੂੰ ਨਿਸ਼ਾਨਾ ਬਣਾਇਆ ਜਾਵੇਗਾ।  

ਲਗਾਤਾਰ ਹੋ ਰਹੇ ਧਮਾਕੇ

ਇਸ ਤੋਂ ਪਹਿਲਾਂ 3 ਫ਼ਰਵਰੀ ਦੀ ਰਾਤ ਨੂੰ ਅੰਮ੍ਰਿਤਸਰ ’ਚ ਫਤਿਹਗੜ੍ਹ ਚੂੜੀਆਂ ਪੁਲਿਸ  ਚੌਕੀ ਦੀ ਚਾਰਦੀਵਾਰੀ ਦੇ ਬਾਹਰ ਧਮਾਕਾ ਹੋਇਆ ਸੀ। ਖੁਸ਼ਕਿਸਮਤੀ ਨਾਲ ਸੜਕ ’ਤੇ  ਇਕ ਛੋਟੇ ਜਿਹੇ ਖੱਡੇ ਤੋਂ ਇਲਾਵਾ ਕਿਸੇ ਦੇ ਜ਼ਖਮੀ ਹੋਣ, ਜਾਨੀ ਨੁਕਸਾਨ ਜਾਂ ਪੁਲਿਸ  ਚੌਕੀ ਨੂੰ ਨੁਕਸਾਨ ਪਹੁੰਚਣ ਦੀ ਕੋਈ ਖਬਰ ਨਹੀਂ ਸੀ। ਲਗਾਤਾਰ ਹੋ ਰਹੇ ਧਮਾਕਿਆਂ ਕਾਰਨ ਸੂਬੇ ਅੰਦਰ ਲਾਅ ਐਂਡ ਆਰਡਰ ਨੂੰ ਲੈਕੇ ਵੀ ਸਵਾਲ ਉੱਠ ਰਹੇ ਹਨ।

• 

  ਹੋਲਾ ਮਹੱਲਾ ਵਿਖੇ 5000 ਪੁਲਿਸ ਮੁਲਾਜ਼ਮ ਤਾਇਨਾਤ, ਸੀਸੀਟੀਵੀ ਕੈਮਰਿਆਂ ਰਾਹੀਂ ਵੀ ਨਿਗਰਾਨੀ- ਹਰਜੋਤ ਬੈਂਸ

  Punjab

• 

  ਪੰਜਾਬ ਦੇ ਹਰੇਕ ਰੂਟ 'ਤੇ ਚੱਲੇਗੀ ਸਰਕਾਰੀ ਬੱਸ, ਮੰਤਰੀ ਲਾਲਜੀਤ ਭੁੱਲਰ ਨੇ ਦਿੱਤੇ ਨਿਰਦੇਸ਼

  Punjab

• 

  ਪੰਜਾਬ 'ਚ ਮੁੜ ਹੋਣਗੀਆਂ ਪੰਚਾਇਤੀ ਚੋਣਾਂ, ਚੋਣ ਕਮਿਸ਼ਨ ਨੇ ਐਲਾਨੀਆਂ ਤਰੀਕਾਂ

  Punjab

• 

  ਆਜ਼ਾਦੀ ਘੁਲਾਟੀਆਂ ਦਾ ਮਾਣ-ਸਨਮਾਨ ਬਰਕਰਾਰ ਰੱਖਣ ਲਈ ਉੱਚ ਪੱਧਰੀ ਮੀਟਿੰਗ

  Punjab

• 

  ਓਏ ਛੋਟੂ, ਪੰਜਾਬ ਪੁਲਿਸ ਪਤਾਲ ਚੋਂ ਵੀ ਲੱਭ ਲਿਆਉਂਦੀ ਹੈ ਮੋਬਾਇਲ

  Punjab