Last Updated :
23 August 2023, 12:19 PM IST
ਸੁਰੱਖਿਆ ਮਾਹਰ ਲੈਫਟੀਨੈਂਟ ਜਨਰਲ (ਸੇਵਾਮੁਕਤ) ਸੰਜੇ ਕੁਲਕਰਨੀ ਨੇ ਰਾਹੁਲ ਗਾਂਧੀ ਦੇ ਹਾਲ ਹੀ ਦੇ ਦਾਅਵੇ ਦੇ ਖਿਲਾਫ ਸਾਵਧਾਨ ਕੀਤਾ ਕਿ ਭਾਰਤ ਨੇ ਚੀਨ ਹੱਥੋਂ ਜ਼ਮੀਨ ਗੁਆ ਦਿੱਤੀ ਹੈ। ਉਸਨੇ ਕਿਹਾ ਕਿ ਚੱਲ ਰਹੀ ਗੱਲਬਾਤ ਦੌਰਾਨ ਅਜਿਹੇ ਦਾਅਵੇ ਕੂਟਨੀਤਕ ਯਤਨਾਂ ਵਿੱਚ ਰੁਕਾਵਟ ਬਣ ਸਕਦੇ ਹਨ। ਇਹ ਟਿੱਪਣੀ ਉਦੋਂ ਆਈ ਹੈ ਜਦੋਂ ਰਾਹੁਲ ਗਾਂਧੀ ਨੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੇ ਪੈਂਤੜੇ ਦਾ ਖੰਡਨ ਕਰਦਿਆਂ ਚੀਨੀ ਪੀਐੱਲਏ ਦੁਆਰਾ ਘੁਸਪੈਠ ‘ਤੇ ਜ਼ੋਰ ਦਿੱਤਾ। ਲੱਦਾਖ ਵਿੱਚ ਆਪਣੇ ਪਿਤਾ ਅਤੇ ਸਾਬਕਾ ਪ੍ਰਧਾਨ ਮੰਤਰੀ ਰਾਜੀਵ ਗਾਂਧੀ ਦੀ 79ਵੀਂ ਜਯੰਤੀ ‘ਤੇ ਸ਼ਰਧਾਂਜਲੀ ਭੇਟ ਕਰਦੇ ਹੋਏ ਰਾਹੁਲ ਨੇ ਕਿਹਾ ਕਿ ਪ੍ਰਧਾਨ ਮੰਤਰੀ ਮੋਦੀ ਦਾ ਇਹ ਦਾਅਵਾ ਕਿ ਚੀਨ ਦੀ ਪੀਪਲ ਲਿਬਰੇਸ਼ਨ ਆਰਮੀ (ਪੀਐਲਏ) ਦੇ ਸੈਨਿਕਾਂ ਨੇ ਭਾਰਤੀ ਜ਼ਮੀਨ ਦਾ ਇੱਕ ਇੰਚ ਵੀ ਨਹੀਂ ਹਥਿਆਇਆ, “ਸੱਚ ਨਹੀਂ” ਹੈ। ਸੰਜੇ ਕੁਲਕਰਨੀ ਨੇ ਗਾਂਧੀ ਦਾ ਟਾਕਰਾ ਕਰਦੇ ਹੋਏ ਕਿਹਾ ਕਿ 1950 ਤੋਂ ਭਾਰਤ ਨੇ ਚੀਨ ਹੱਥੋਂ ਲਗਭਗ 40,000 ਵਰਗ ਕਿਲੋਮੀਟਰ ਦਾ ਹਿੱਸਾ ਗੁਆ ਦਿੱਤਾ ਹੈ ਅਤੇ ਸਾਡੀ ਕੋਸ਼ਿਸ਼ ਹੈ ਕਿ ਅਸੀਂ ਚੀਨ ਤੋਂ ਆਪਣਾ ਕੋਈ ਹੋਰ ਖੇਤਰ ਨਾ ਗੁਆ ਦੇਈਏ। ਸੰਜੇ ਕੁਲਕਰਨੀ ਨੇ ਜਿਕਰ ਕੀਤਾ ਕਿ ਭਾਰਤ-ਚੀਨ ਫੌਜੀ ਵਾਰਤਾ ਡੈਮਚੋਕ ਅਤੇ ਡੇਪਸਾਂਗ ਵਿਖੇ ਟਕਰਾਅ ਕਾਰਨ ਜਾਰੀ ਹੈ, ਜਿੱਥੇ ਗਸ਼ਤ ਪਾਬੰਦੀਆਂ ਲਾਗੂ ਹਨ। ਪਰ ਇਹ ਕਹਿਣਾ ਕਿ ਅਸੀਂ ਹਾਰ ਗਏ ਹਾਂ ਗਲਤ ਹੈ… ਅਜਿਹੇ ਬਿਆਨ ਦੇਣਾ ਗਲਤ ਹੋਵੇਗਾ ਅਤੇ ਜਦੋਂ ਗੱਲਬਾਤ ਚੱਲ ਰਹੀ ਹੋਵੇ ਤਾਂ ਕਿਸੇ ਨੂੰ ਬਿਆਨ ਨਹੀਂ ਦੇਣੇ ਚਾਹੀਦੇ। ਇਸ ਦੌਰਾਨ, ਭਾਰਤੀ ਜਨਤਾ ਪਾਰਟੀ (ਭਾਜਪਾ) ਦੇ ਸੰਸਦ ਮੈਂਬਰ ਰਵੀਸ਼ੰਕਰ ਪ੍ਰਸਾਦ ਨੇ ਕਿਹਾ, “ਕੁਝ ਵੀ ਕਰੋ, ਪਰ ਤੁਸੀਂ ਭਾਰਤ ਦੇ ਸੁਰੱਖਿਆ ਬਲਾਂ ਦਾ ਮਨੋਬਲ ਘੱਟ ਕਰਨ ਦੀ ਕੋਸ਼ਿਸ਼ ਕਿਉਂ ਕਰਦੇ ਹੋ?“ ਇਸ ਤੋਂ ਇਲਾਵਾ, ਮੋਦੀ ਸਰਕਾਰ ਦੇ ਅਧੀਨ ਸਥਿਤੀ ਨੂੰ ਉਜਾਗਰ ਕਰਦੇ ਹੋਏ, ਪ੍ਰਸਾਦ ਨੇ ਕਿਹਾ ਕਿ ਅੱਜ ਵੇਖੋ ਮੋਦੀ ਸਰਕਾਰ ਦੇ ਅਧੀਨ ਲੱਦਾਖ ਤੋਂ ਅਰੁਣਾਚਲ ਪ੍ਰਦੇਸ਼ ਤੱਕ ਸੜਕਾਂ ਅਤੇ ਪੁਲ ਵੱਖ-ਵੱਖ ਹਾਲਾਤਾਂ ਵਿੱਚ ਤੇਜ਼ੀ ਨਾਲ ਪ੍ਰਤੀਕ੍ਰਿਆ ਕਰਨ ਲਈ ਫੌਜ ਦੇ ਵਾਹਨਾਂ ਦੀ ਮਦਦ ਕਰ ਰਹੇ ਹਨ। ਰਾਹੁਲ ਗਾਂਹੀ ਦਾ ਇਹ ਬਿਆਨ ਲੱਦਾਖ ਸੈਕਟਰ ਵਿੱਚ ਤਣਾਅ ਨੂੰ ਠੰਢਾ ਕਰਨ ਲਈ ਭਾਰਤੀ ਫੌਜ ਅਤੇ ਚੀਨੀ ਪੀਐਲਏ ਦੀ ਮਿਲਟਰੀ ਵਾਰਤਾ ਦੇ 19ਵੇਂ ਦੌਰ ਦੇ ਆਯੋਜਿਤ ਕੀਤੇ ਜਾਣ ਤੋਂ ਕੁਝ ਦਿਨ ਬਾਅਦ ਆਇਆ ਹੈ। ਇਸ ਮਾਮਲੇ ਤੋਂ ਜਾਣੂ ਅਧਿਕਾਰੀਆਂ ਨੇ ਦੱਸਿਆ ਕਿ ਅਸਲ ਕੰਟਰੋਲ ਰੇਖਾ (ਐਲਏਸੀ) ਦੇ ਨਾਲ ਬਾਕੀ ਸਮੱਸਿਆਵਾਂ ‘ਤੇ ਚਰਚਾ ਕਰਨ ਲਈ ਸ਼ੁੱਕਰਵਾਰ ਨੂੰ ਦੋਵਾਂ ਧਿਰਾਂ ਨੇ ਮੁੱਖ-ਜਨਰਲ ਪੱਧਰ ਦੀ ਗੱਲਬਾਤ ਕੀਤੀ।
